رواية براءة حب..

اهلين وسهلين

واحد الحين واحد بعدين ;)

شخباركم بنات..؟

بما اني من زمان ما دخلت اعطيكم موضوع دسم شوي :D

وهو

رواية براءة حب وهي رواية امراتيه ((فدييييييييييت الامارات))

بقلم الكاتبة معاني

وبسم الله نبدأ

الجزء الأول ..

"شمـا" و "منـى" بنات عم ...."شما" عايشه في بيت عمهاا ..بعد ما أبوها طلق أمها..وبعد وفاة ابوها..عاشت في رعاية عمها ..لان ريل امها .رفض ان شمـا اتعيش معاهم ..بحجه انه ما يقدر يصرف ع شما
كانت علاقة شما بعيال عمها ..شرات الأخوان ..و كانت تعتبر منى مثل أختها..وعمهاابعمره ما حسسها شي فرق بينها و بين عيالها عكس زوحته..احيانا كانت اتقارن من بينها و بين منى ..و احيانا اتعاملهااا زيـــــن ...
....
"شما و منى" آخر سنه لهم في الكليه ..كانوا يمشون مع بعض و يردون ..الكل كان يحس انهم شرات التوأم ..
و في يوم كانت .."منى" غايبه عن الكليه ..كانت اتجوف ان ما عليهاا مواد ولا واجبات في هاليوم ..
و في اخر حصه لهم ..
"شما" اتكلم ربيعتهم "منال"
شما (مستانسه):- ويـــــه فكـه اليوم وايـــــد طويل ..
منال: حظها منى اتحصلينها راقــــــده.
شما(تضحك) :-الخايسه ..قلتها بدق لج كل ساعه ما بخليج ترقدين ..و الحين كل ما ادق الموبايل مغلق ..
منال: يالله ما باجي شي غير اسبوعين ..و بنودع الكليه ..منو بيي ياخذج ..اوصلج؟
شما: لا اتصلت لـوليد بيينـي.
منال: عيـل يالله تأخرنـــــــا..
وعند باب الكلية .تمت شما واقفه ادور ع سيارة "وليد"
منال: زين تعالي بوصلج ..اتصلي به و قوليله انج بتردين معاي ..
شما: لا لا انا قلته و خلاص ..زين روحي انتي ..عادي بترياا ابروحي..
منال: دقت فيج خيانه ..منى .
شما: هيييه و الله لو انا كنت مكانها..ما بغيب عشان ما اخليها ابروحها.
منال (تضرب ايد شما) :- يا الطفسه انا معاااااااج.
شما (تضحك) سوري و الله ..ما قصدت جي هههههاايي
منال : زين بسير عنج اتعرفين الدريول بسير المدرسه بييب خواني .
شما : ابرايج ..سلمي ..
منال : (وهي تتغشى ): الله يسلمج باي ..
اتصلت "شما" بتلفون وليد .ما كان يرد علييها ..يلست ادور يمكن واقف مكان هي مب جايفتنه ..ترمس عمرها "وين وين مكسيما بيضااا ..ويــــــــن..اويه هناك ..وين واقف اخر الدنياا"
طلعت "شما" سايره صوب السياره ..فتحت السياره .ويلست .. اتسندت ع السيت..غمضت عيونها ..اتكلم وليد..
_ شفيك اتاخرت هالكثر ..اتعرف هاليوم ما ادانيييه وايد طويل ..
استغربت "شما" ان وليد ما تحرك ولا لايرد عليها ..فتحت عيونها اطالعه ..اتفاجات ..بلي يالس حذالها شخص ما اتعرفه ..و هو كان يطالعها و يبتسم...يعني هاي مب سياره وليد ..و هاااااا مب وليد..
حست "شما" بالاحراج استحت فتحت باب السياره..
_ اسفه ع بالي اخوي.
_ عادي بوصلج.
_لا شكرا..
نزلت "شما" من السياره ..و بسرعه سارت ..داخل الكليه ..يلست تعاتب عمرها" غبيه ..ليش ما انتبهتي ..وااي فشله ..ابيه ..و انا ماخذه راحتي اسولف جنها سيارتي"
شويه ورن موبايلها..
_وليد وين انت ؟؟
_اطلعي واقفنج برع مجابل الباب.
_شفتك خلاص.
ركبت "شما " السياره اطالع ها وليد
_بلاج اتجوفيني جي.....
_ماشي اتاكد اذا كنت انت وليد ولا حد غيرك.
وليد: (يضحك) جـي حوله.
شما :هي هي تنكت.
وليد:- انتي ليش ما غبتي اليوم ..مع منى .
شما : علي حصص .
وليد: (مستغرب):عيل وين فايلاتج..و اوراقج.
شما (محطيه ايدها ع حلجهاا) : ابيــــــــه نسيتهم هناك ..و الله من الربكه.
وليد: (مب فاهم شي):-
وين هناك ...؟؟
شماا: امممم ..وين بعد بالكليه..
وليد: انا اول مره بحياتي اسمع عن حد يسير يدرس و ينس كتبه ..بالكليه.
شما(تعاتبه) كل منك اتاخرت علي.
وليد: زين نرجع الكـليه.
شما فـ(خاطرها) ها الحيـن كيف اقوله اني نسيتهم بسياره شخص ما اتعرفه ....
شما :_ لا مب لازم باجر علي حصص غير ها الحصص الي خذتها اليوم.
وليد: الحمدلله ..بعد ما اروم ارجع ..
شما (تضحك) كنت تجاملني .
وليــد : لا اســـــولف ..
شما : سخيـف..
بعد ربع ساعه وصلت شما ..البيت ..دخلت حجرتها ..جافت منــــى يالسه ع الكمبيوتر ..
شمـا: انا واقفه هناك تعبـــــانه و انتـي يالسه هني بالبرااد ولا مشغله النت.
منى : شو اسوي حظي جـي ..ليش تاخرتي.
شمـــا : ابيـــــه اسكتـــــي ..ركبت مع واحد ..
طالعت (منى) (شما) مستغربه..
منى : تلعبين من وراي..
شمـا (تفسخ عبايتها) لا تستوين غبيه ..ع بالي وليد ركبت سيارته طلع واحد ما اعرف منووووو..؟؟

منى (تضحك) : شـو سويتـــــي هههههههههااي فضيحه انتي..

شمـا :اتفشلت ..المصيبه ..اوراقي و بطاقاتي بسيارته كيف ايبهااا ..

منى : ويه كيف تدخلين الكليه من غير بطاقتج .

شما : شسوي الحين ...؟؟
منى : باجر اوقفي و دوري السياره ..

شما: اونج ..ستين مكسيما لونها ابيض واقفه برع الكلية..

منى (مب مهتمة) عـادي لااه طلعي بدل فاقد للبطاقة .

شما: و اذا عمي سالني وين خذت البطاقة ..انزين أوراقي و بحوثي ..شسوي منىىى

منى: ما ادري..
انفتح باب حجرة (منى و شما) ..

_ هـا شما تغديتي يبه.

اجدمت (شما) من عمها و باست راسه.
_تغديت في الكليه..

العم : جي ما يعيبج طباخ عمتج .

شما (تبتسم) اكيد يعيبني بس كنت يوعانه ..ما تريقت ..فما صبرت اترياا الغدا لي ما ارد البيت..

العم : عيل وليـد وينه.؟؟

شمـا : ما ادري نزلنـي و راح.

منى: قال بيظهر مع ربعه.

العم: وين بيسير بعد اليوم..

منى : ما ادري فيه,

العم : انتي بسج من الكمبيوتر بتحول عيونج.

شما تضحك و منى اطالع ابوهـا..
منى: ابااااه صل ع النبي يالسه اسوي بحوث حق الكليه .

(العم) و هو يصكر الباب ..
_الله يوفجكم.

انسدحت (شما) ع الشبريه ..

_تعـــــبانه برقــــد ..قوميني الساعه..4..اونج اتسوين بحوث ولا يالسه ع الشـات..

منى : ما يخصج..اذا تكلمتي زياده ما بقومج الساعه 4

(شما) تجلب اتحـاول ترقد ..و (منى) يالسه ع النت مرات تضحك بصوت عالي ..ع التعليقات الي تقراهـا بالنـت ..

شمـــا : اوووووه خفي صوتج ابا ارقد حرام عليج انا تعبانه .
منى : سوري سوري ..شسوي يضحكوني ..

بها اللحظه رن موبايل ..(شمـا)
شما: ناقصه انــــا بعد منو متصل بها الوقت ..
جافت رقم غريب ما اتعرفه ..

شما: منى ما ادري داق لي ما اعرف الرقم.
منى: ردي و جوفي منو.

شمـا: الـو
المتصل: اخـت شما.

شمـا: منو ؟؟

المتصل: انا الي من ساعه ركبتي سيارته بالغلط.
شمـا : من وين لك رقمـــــي..

(منى) سمعت هالعباره ..قامت من مكانها ويلست حذال(شما) تسمعها شو اتقول.

المتصل: ترا رقمج و اسمج موجود ع البطاقه ..فقلت اتصل عشان اغراضج الي نسيتها فـ السياره..اكيد بتحتاجينـهاا

شمـا : هي زين سويت ..مشكور.
المتصل: وين ايبها لج..

شما : حطها مكان في مكتبه ..و انا بمر باخذهـا..
المتصل : خلاص انا العصر بسير احطهاا..و انتي خذيها المغرب او العـشا..

شمـا: ما اتقصر اخوي ..
صكرت التلفون..

منى: منووووو هــــــــــا؟؟
شمـا(تضحك) ها الي ركبت عنده بالغلط ..يبا يوصل ملفاتي..

منى: يا الخديه ما اتفقتوا ع المكان.
شمـا : ويـــــه و الحيـن؟
منى :دقي و اساليه وين بتخلي الفايلات.

شمـا : استحي اتصلي انتي.

منى(قامت من مكانها سايره عند الكمبيوتر)
_ مايخصنـــــي ..

اتصلت (شما) فلما سمعت صوت المتصل..
شما (مستحيه) سوري بس ابا اعرف أي مكتبه بتخلي فيها فايلاتي..

المتصل: وين مكتبه جريبه لكم..

شمـا : عـادي أي مكان ..
المتصل: خلاص بخليها فـ مكتبة دبي و باسم خالد.

شما: ها اسـمك.
المتصل: هـــــي ..عيبج؟!
شما: (انتبهت انها اتمادت معاه) : خلاص مشكور اخوي مع السلامه .

وصكرت التلفون.
منى : شسمه؟
شمـا : خـالد..باين عليه مغازلجي.

منى (تضحك) حـــــلاته.
شمـا: عاد انتي تعيبج هالسوالف...
منى: شنسوي نتســــلى ..لي ما انعرس اووف متى بنعرس شمووه.
شما (تضحك) بلاج مستعيله.

منى: ابا اعـرس شو هـا ..بنخلص الكليه ..و بعدين شو بنسوي.

شمـا: ما شا الله اتعرفين وايـد ..اتنقي واحد منهم.

منـى : ما يعيبـوني ..ولا واحد منهم دش خاطري.

شمـا:- انزين متى بنسير المكتبه.
منى: امممم انا اليوم قلت بجابل حمود ..باخذج معاي وبنزلج المكتبه ..لي ما الف جم لفه مع حمود.

شمـا : لا و اللـــــه و انا ايلس انطرج فـ المكتبه ساعه.
منى: سوي عمرج تشترين شي..نـص ساعه الا هي ..يلا شموه عشان امايه تخلينا نطلع ..

شمـا: انا ما يخصني بطلعاتج ..بعدين عموتي بضاربني انـا ..

منى: و الله بساعدج..يالله فرصه لي عشاني.
شمـا: انزين بس نص ساعه.
قامت (منى) من مكانها تحضن (شما) و تبوسهاا ..
منى: فديتج شمووه..

شمـا:( تضحك) يا المصلحجيه...دوم تظهرين مع منال و تلبسيني هالمره بس عشان اجابلين ربيعج تبين تظهرين معاي.
منى: يالله خليني اعيش حياتي لي ما اعرس.

شمـا: بتندمين بعدين .

منى: ترا هم يقصون علي و انا بعد اقص عليهم ..

شمـا: اذا انكشفتي محد بتزوجج صدقيني.
منى: مــــال اول انتـــــــي..
شمـا:-- كيفج انا قلتج و اسكتي خليني ارقد.

منى: ما بقى شي ع الساعه 4.
شمـا: ابرايه لو ارقد ربع ساعه بتكفينـي.

رقدت (شما) و واصلت (منى) يلستها ع النت.

***
يتبـع >>>
بكمل بس اذا شفت ردود

انتظركمـ

[color:860f="Purple"]هييييييييييييييييييييييه كملي كملي

"يــــســــلـــــمو بس كملي "

ان شاء الله اكمل

بس ما شفت ردود تفلج الصدر!!

يله بنات ابي ردودكم

يـــآآآآآ هــوووووووووه كــمــلــي كــمــلـي يـلـه مــشــآآآنــي Crying or Very sad

يله بكمل

برب بروح انسخها

الجزء الثاني

وقت المغرب ..و في بيت (بو وليد) و بتحديد في الصاله ..
شمـا (اتكلم عمتها) :عموه بسير المكتبه.
العمه: انتي كل يوم اتسيرين المكتبه.

شمـا:اول امس كانت منى تبا تشتري و اليوم انا
العمه: و ليش ما شريتي مع منى اتخلصين اغراض كلها مره وحده ..انتي ما اتقرين في البيت.

شما(مضايجه من رمسه عمتها): ما بتاخر .
العمه: خذي معاج منى لا اطلعين ابروحج.

شما: ان شا الله.

دشت حجرتها مضايجه من اسلوب عمتها..
منى: هـا انسير.
شمـا: هـــي

منى: بلاج مضايجه.
شما: فـ البدايه ما رضت عموه بعدين عادي.
منى: المهم خلتنا نطلع.

و في الطريق..طلعت (منى) موبايلها
شما: بدقين لمنو..؟؟
منى: بقول حمود يوقف عند المكتبه..عشان انتي تنزلين و انا بركب معاه.

شما: ها مب جنج من كم يومين طلعتي معاه.
منى: لا هذاك سلوم..اسكتي رن موبايله.
(شما) تسمع (منى) ترمس بالموبايل..
منى: عيوني حمودي يلا انا جريبة من المكتبه انت وين....اوكى خلاص انا الحين بوصل ثواني بس..

بعد ما صكرت (منى) التلفون ..
شما: انتي ما تخافين لو جافج وليد ..

منى : خلاص اتعودت ..عادي..
شما: الله يهديج..
منى: يهدي الجميع يا شريفة مكة..
شما : امممم وصلنا المكتبة ولا كنت بضارب معاج..

منى: (تضحك) هههههاي اسولف حبيبتي..

نزلت (شما) وراحت المكتبه ..و طالعت (منى) وجافتها تركب السياره..و بعد ما تحركت السياره الي ركبتها (منى)

دشت (شما) المكتبه..وسارت تسال البياع..
شما: لو سمحت عندك هني اوراق باسم خالد.
البياع: (يهز راسه) موجود.

استلمت (شما) الملف..و يلست اتقول في خاطرهاا "الحين شو اسوي..فـ المكتبة لا شغله ولا مشغله..الله يخس ابليسج منوووووه""

يلست اتحاوط في المكتبه اتلف و ادور ..وحست انها حفظت كل شي ينباع فـ المكتبه..

كانت واقفه اطالع اوراق املونه ..اتفكر تشتريها حق البحث مالها..
انتبهت للصوت الي كان جريب منها.
_ها وصلتج الامـانه.
اتفاجات (شما) يوم جافت (خالد) واقف حذالها يرمسهاا حست بالخوف ..لانها كانت ابروحهاا..و من خوفها ما ردت عليه ..تحركت و سارت بعيد عنه..

طلعت موبايلهاا..ادق لـ (منى)
شما: (معصبه) انتـي وينج ..
منى: اشفيج تو الناس ....

شما: (من بين اسنانها) شو تو الناس ..نحن اتفقنا جم دقيقه و انتي كم صار لج.

منى(تترجى شما) :- صبري شويه شمووه بليز.

كانت (شما) اترمس (منى) و ادور (خالد) فلما جافته واقف ابعيد يدور شي يشتريه قالت.

شما: منـىو الله لو ما ييتي الحين بسير عنج البيت و خل عموه بس تسالنـي وين انتي و جوفي شو بقولهـا.

منى: انزيــــــن خـلاص دقايق لي ما ايي المكتبه اوف منج..
وصكرت التلفون بويه (شمـا)

**
و في البيت بعد العشاا...الكـل يالس في الصاله.الا وليد.
بو وليد: منى باجـر بسيرين الكليه.
منى: هيه ابـويه .
ام وليد: يالله ما باجي شي و بتتخرجون ..بترتاحون من صدعت الراس.

شمـا: بس وايد ضاغطين علينـا.
ام وليد: حتى نحن مضغوط علينا في مصاريفكم ..بس يالله ..باجر بتعرسون و بتخفون علينا..

اضايجت (شما) من نغزات عمتهاا..كانت اتعرف انها تقصدها.لان عمها يصرف عليها ..
منى: (تحاول تهدي السالفه) : محد قالكم اتيبـوناا شرات ما يبتـونا ابتلـوا فيـنا الحينه.

بو وليد: (يضحك) كنت اقول هالعباره حق ابوي الله يرحمه.
ام وليد: و اللــــه الحين حتى الي ما يبناهم كاسرين ظهرنا بالمصاريف.

بو وليد: الله يهداج ام ولـيد باجر بشتغلون بصرفون علينا شرات ما صرفنا عليهم.

حست (شما) انها مب قادره تستحمل نغزات عمتها ..هي ما اتعرف ليش اليوم حاطه عليها .. البارحه كانت وايد زوينه معها ..

شما (هي واقفه) : انا بسير اكمل واجبات.
وسارت حجرتها..

يلست بحجرتها..اتفكر لو كانت عايشه مع امها ..يمكن يكون حالهاا اردى من الحيـن ..فقالت فـ خاطرها "الحمدلله ع كل حـال"

يلست تفتح الفايل مالها.. وتتصفح اوراقها..استغربت من عباره مكتوبه لها في اول ورقه .."فيج جمال ابصراحه رهيب"

دشت (منى) الحجره..
منى: بلاج شمـــــووه..مضايجة من كلام امايه.
شما: لا عـادي عموه شرات امايه .. بس تعالي جوفي شو مكتوب هنـي.

اجدمت (منى) من (شما) قرات العباره الموجوده ..
منى: منو هــــــا الي ما عنده ذوق.
شمــــا: اكيد خالد..ما يستحي اتعبث باوراقي.

منى: يالله اتعرفي عليه شو تتريين.
شما: لا الشيخه انا ما ارمس الا ريلي .

منى: (تتطنز) عيــــل احلمــــي اتحصلين ريل ...خلينـــــي ادش الشات.

قامت من مكانها اتشغل الكمبيوتر ..فتحت (شما) شنطتها ..اطلع قلم ..فانتبهت ان واصلنهاا ..مسج..
"اغلى البشر تبقى اقرب و اعز الناس"

شما (اتصارخ) منـــــــــى الحقــــــي.
منى: بسم الله شو فيج.
شمـا " اسمعي خالد شو مطرش لي .. اغلى البشر تبقى اقرب و اعز الناس"

منى (تضحك بصوت عالي) :- حـرام شمووه الريال ميت فيج.

شمـا : لا لعب يهــــاال.
كتبت له مسج.."عيب عليك "
رد عليها ابمسج"و الله دشيتي خاطري بعمري ما جفت وحده بحلاتج و بخجلج""

كانت (منى) تضحك ع مسجات (خالد) و(شما) محرجه لانها حست انه مصخهاا ..

منى : عطيني موبايلج..
شمـا: خذي بس لا تكتبين كلام حـــــب ..اعرفج انا.
منى : لا بادبــــــــه.

يلست (منى) اطرش مسجات لـ (خالد) و (خالد) يرد عليهـــــاا..و (شما) كانت تكتب واجباتها امطنشه السالفة **

و في حجرة (وليد) وليد يالس يطالع مباراه..دش عليه (بو وليد)
وليد : حيــــــــاك الـوالد.
بو وليد : انت ما اتمل من المباره.يا سهر ويا الشباب ..يا اتطالع مبارايات.
وليد : شو نسوي ..هاي الدنـيا..
بو وليد: عيل بنتك متى بترد من السفر..
وليد: اظن الاسبوع الياي..

بو وليد: ما اتفكر تزوج عشانك .. وعشان بنتك..يا بوك الحين صار عمرك ثلاثين.و بنتك ست سنوات.

وليد: الله يخلي الوالده ..هي اتربي بنتي.
بو وليد: ما اختلفنا *** مب مقصره مع بنتك ..لكن انت..
وليد: ما افكر بالـــــزواج بعد "حنان" الله يرحمها.

بو وليد: حنان متوفيه من اربع سنين ..و اظن هاي فتره مب شويه.

اشويه ودشت (ام وليد) و شاله معها صينية الشاي..
ام وليد: هــــا اشفيكم سكتوا يوم دشيت.
وليد : تعالي الحقي ليـريلج يبا يزوجني غصب.

ام وليد: هاي الساعه المباركه..انت اشر لي ع البنيه الي تباها .. و انا من باجر بخطبها لك.

وليد: الحين اباج عون صرتي لي فرعون..
بو وليد : (يضحك) اليوم انا و *** مب طالعين من حجرتك الا اتقول لنا خلاص بعرس.
وليد: خيبه تبون اعرس غصب.
ام وليد: عشــــان هاي الصغيرونه..

وليد: افا خلاص ما تبين تربينهامليـتي.

ام وليد: افا و الله ..مهره بنتي و اكثر بعد..بس انت لازم بتزوج تستقر بحياتك..بسك من الطلعات و السهر برع البيت.

بو وليد: اشـــــرايك بشـما بنت عمك.
وليد: شمووووه شرات اختي.

ام وليد : لا لا شو شمـا ..شي بنات غيرهـا.

بو وليد: شو فيها شمـا.. وبعدين انا وصي عليها ..و ما بطمن الا اذا خذتك..بعد موتي برتاح اني خليتها بامان...اخاف باجر تزوج واحد و يظلمهاا..

ام وليد : نعــــــــم و الله نحن تحملناها و تحملنا تربيتها بعد تبا تزوجها ***نـا.

وليد: البنيه ما فيها شي ..بالع** بس يا يبا انا عمري ثلاثين ..و هي يا دوبك بتدخل ثلاث وعشرين سنه..وايد عود عليهاا..

بو وليد: لا عود ولا شياته..شما بداري ع بنتك احسن من الغريبه و انت عارف هالشيء.

ام وليد (واقفه) دام الي اخترت شما عيل اقولك تم جي ولا اتعرس احسن.

و طلعت برع الحجره..

وليد: امـــــايه ليش جي اتفكر.
بو وليد: ما عليك من *** ..اذا تبا البنيه..قول .. و ان شا الله بعد التخرج ع طول بزوجها لك..

وليد: يضحك ) ما تبا تاخذ شورهـا.
بو وليد: هــــاي تربيتي اكيد بتوافق انا اعرفها..
وليد: خلاص بعد التخرج اخطبها لي..و ان شا الله الوالده ما تزعل.

بو وليد (مستانس) الله يوفجكم ..و *** هاي خلها علي..

**
.

يتبع>>

اليوم الثاني و في الكلية
منى: اووووف شو الاستاذ كل مره يطلع لي اخطاء في البحث اشتغل عند ابوه ..

شمـا (تضحك) ويــــــه عيــــل مشى علي السالفه..
منى: انتي دووووم حظج ناقع..
شمـا: صلي ع النبي..انتي اصلا كل مجابله الشات و الموبايل وين بتفلحييييين.

منال: بسكم ضرابه يالله خلصت الخمس دقايق..
منى: يا رب انخطب اليوم و املج باجر و اعرس ورا باجر..

منال (تضحك) :- خيبه..خلي حمود يتزوجج
منى: اتصدقين لو ما لقيت ريل..بخليه يخطبني خـلاص تعبت ابا اتزوج.

شما: ما عندكم سالفه..بسير الكلاس احسن لي..

منال: صبري اتفقنا انا و منى بنسير المارينا بتيـن معنـا..
شمـا: كل وحده مواعده واحــــد و الله انا اسير شو اسوي؟؟

منى: واعدي خــــــلوووود.
شما: منــــــى
منال: منو خلود هـا من ورانا.
منى: سوري و الله شموو عن تكفخيني .اسولف بلاج انتي.

شمـا: زين انا ما بسير .
منى: الله يخليج تعالي ..اذا ما ييتي امايه ما بتخليني اطلع ابروحي.

شما: اسير شو اسوي ابروحي هناك..
منى: سيري السينما ..
شمـــا: امممم خلاص بسير بس بشرط.
منى : شـوو؟

شمـا : تعزميني ع حسابج ..حتى تذكره السينما ع حسابج شو قلتي..؟

منال (تضحك) استغلاليه.
منى: ما عليـــــــه موافقــــــه.

شما : عيل جـــــي بسير بس انتي قولي عموه انج بظهرين مب انا ..اخاف اتحرج علي..

منى (تضحك) ما يهمج.
**
تندمت (شما) لانها وافقت انها اتروح المارينا مع (منى ) و (منال) الحين ابروحها واقفه ملانه .. و الفلم المعروض بالسينما جايفتنه قبل..

قررت انها تيلس صوب البحر..دقايق و بعدين تتصل بـ (منى)..عشان ايردون البيت..

كانت تتأمل البحر.. التفت الصوب الثاني جافت ..ام و اب يلاعبون ***هم ..ابتسمت و قالت في نفسها.."يا ربي ان شا الله في يوم اكون جي مع ريلي و عيالي ..ونـاسه"

يلست ع الكرسي اطالع البحر..و انتبهت شي شخص جريب منها يالس ع الكرسي..يتأمل البحر..اتوقعت (شما) ان هالانسان شايل هموم الدنيـا ع راسه..كانت اتحس ان محد موجود بالعالم غيره..

من نظراته..كانه يقول للبحــــر كلام و يفضى قلبه من كلام تم بقلبه..سنين..

التفت لها الشخص وهو حس ان حد يطالعه..انصدمت(شما) يوم جافت هالشخص خالد..
ابتسم لها (خالد) ارتبكت (شما) و صدت الصوب الثاني...خايفه من انه يجرب منها او يحاول يكلمهاا..

طلعت موبايلهاا تتصل لـ (منى)
_ الغبيه ما اترد علي..

بطلت عيونها ..يوم سمعت صوت (خالد) يقول لها..
_مشكوره ع المسجات.

شما (مرتبكه) أي مسجات.
خالد: البارحه الي كنتي اطرشيها لي..

شما: (هي واقفه) لو سمحت..لا تتكلم معاي ..ولا يكون اطرش لي مسجات ثاني مره..

وراحت داخل..و يلست بـالكافترياا...وطلعت موبايلهاا..ادق لـ (منى)
شما: انتي ويــــــنج.
منى: بلاج الحين ..تو الناس ساعه ما كملتي في المركز..

شما: الفلم جايفتنه..و انا الحين مب عارفه شو اسوي.
منى: ما جفتي خالد.؟

شما(مستغربه ) امبلــــى بس طنشته ليش..؟؟و شدراج انتي بخـالد..؟؟!

منى( تضحك) ترا طرشت له مسج ع اساس يجابلج هني..روحي رمسيه ..يلا انا بصكر..

شما (معصبه) انتي باي حق تسوين جي..منـى اذا ما ييتي الحين بسير البيت ابروحي..

منى: روحي امايه بضاربج اذا جافتج من دوني بتقولج انتي ودرتيني..

شما: بقولها انتي وين .....؟؟ و مع منو..؟
منى: يا ويلج ..
شما : عيل تعـــــالي الحينه..
منى : (محرجه) زيييييين نص ساعه بس..
شما : بس نص ساعه و بنجوف ..يالله باي.

عصبت(شما) من حركات (منى) الحين (خالد) بظن ان (شما) لها حركات و سوابق مع الشباب و هي مب من هالنوع ابد..

**

و في البيت
شمـا: انتي منو امرج تمسكين موبايلي و ادقين لفلان و علان و اطرشين له مسجات.

منى: انتي تدرين اني كنت اطرش مسجات لخالد ع اساس انج انتي.

شما: انا قلتلج ادبيه مب تغازلينه.
منى: اوووه شو صار الحين ..انجلبت الدنيا.

شما : هاي اخر مره اطلع معاج و مره ثانيه لا تمسكين موبايلي خير شر.

منى: شو تهدديني انتي..

بها اللحظه انفتح باب الحجرة فسكتت (منى)
بو وليد: شفيكم..
منى: (اطالع شما) ولا شـي..خير ابويه..

بو وليد: منى شويه سيري عند اخوج ساعديه يرتب ملابسه باجر بيسافر.

منى: ع وين ......؟؟
بو وليد: عنده دوره شهرين..
منى: و بنته ما بيجوفها الاسبوع الياي بتيي من السفر..

بو وليد: شو يسوي لازم يروح الدوره ما قدر ياجل ..المهم روحي ساعديه..

منى(طالعه من الحجره) ان شا الله.

يلس (بو وليد) ع الشبريه حذال (شما) و حط ايده ع جتفها..
بو وليد: بلاج بويه ضايجت بج منى..

شما: لا عمي اتعرف دوم نضارب و نتصالح شرات اليهال..
بو وليد(يضحك) خلاص الحين انتي كبرتي و كلها كم اسبوع بتصيرين عروس..

شما (مستغربه) بصير عروس !!

بو وليد: هي وليد ***ي يبا يخطبج شو رايج..؟
(شما )ساكته مستغربه من كلام عمها..

بوليد: يا بنتي انا اعرف انج ما كنتي تتوقعين هالشي .. و انج تعتبرين وليد شرات اخوج..بس محد يضمن الزمن ..انتي الحين مستوره فـ بيتي و الحمدلله ..

لكن فكري بعدين يوم بموت محد يضمن الظروف و نفوس البشر الي بتتغير ..

حست(شما) انه كان يقصد عمتهاا ..الي هي(ام وليد)

بو وليد: انا ما بجبرج..الريال يبا زوجه و ام لبنته ..و ما جاف الانسب الا انتي..بنت عمه..بتتحمله و بتتحمل بنته.
باجر الصبح بيسافر..عنده دوره في انجلترا..و اذا الله كتب نصيب بيكون الزواج بعد ما يرجع من الدوره..ع طول..
فكري الراي رايج.

تمت (شما) ساكته متفاجاه من كلام عمها..باسها عمها فوق راسهاا و طلع من الحجره...

شويه ودشت عليهاا (منى)
منى: شو كان يباج ابويه.

شما: ما بتتوقعين.
منى: شو عن امج....؟؟
شما : لا بس انتي جفتي وليد..؟
منى: هي ليش شو بلاه..

شما: ما قالج شي..؟؟
منى: سال عن ابويه و قلته انه يسولف معاج .شو السالفه..

شما(مستحيه): انخطبت ..

منى : شووووووو ..منو ..؟؟
شما: منو تتوقعين..

منى: انتي قولي ما اتوقع حد يالله قولي منو لا يكون خالد..؟؟

شما : لا شو خالد..

منى: عيل ..

شمـا: اخوج وليــــــد الي هو *** عمي.
منى: ليش انتي تحبينه..كنتي تغازلينه من وراي صح عشان جي محرمه عمرج من كل الطلعات.

شما: لا تستوين غبيه انا طول عمري كنت اعتبر وليد شرات اخوي.

منى: شما لا اتعرسين قبلي بموت من الحره.

شما بقلبها"طول عمرج بتمين حسوده شرات امج"

منى: انزين لا توافقين.

شما: عمي قال افكر بالموضوع.

منى : انتي دوم جي محظوظه..

شما: حرام عليج اتمني لي الخير.

منى: اسولف..

قامت و طلعت من الحجره

يتبـع>>

الجزء الثالث

عرفت(شما) ان (منى) اضايجت من خطوبتهاا,, ما توقعت ان(منى) تغار منها لها الدرجه..مرة ثلاث ايام ع الكلام الي دار بين (بو وليد) و (شما) ..

بها الايام الي مرت لاحظت (شما) ان (ام وليد) صارت معها جافه اكثر من قبل..بس (شما) كانت تحاول تبين احترامها...لانها بعد ما تقدر تنكر جميلهاا..

و (منى) كانت تقنعها انها ما توافق و إذا وافقت تتريا لي ما تنخطب ع أساس كلهم يتعرسون مره وحده..

كانت (شما) أتقول في خاطرها أنا بعدي ما وافقت و جي يسون..
عيل لو وافقت شو بيصير ..فكرت إنها تتصل لامها أتخبرها بسالفة الخطبه..
شما: امـــاية شحالج الغاليه..؟
ام شما: ابخير اشحالج انتي ..؟
شما: الحمدلله ابخير ..امايه ابا اقولج شي بس مستحيه.

ام شما (تضحك) تستحين من امج..يالله قولي شو السالفه.

شما: انا انخطبت.
ام شما (مستانسه) و الله قلبي كان حاس..منو ؟
شما: وليد *** عمي.

ام شما : وشو رايج بالموضوع.
شما: ما ادري امايه.. ابا رايج.
ام شما: (كانت تفكر) شوفي امايه انا ما اقدر افرض عليج رايي ..لكن اذا تبين *** عمج ..نصيحه اشرطي قبل ..ان يكون لج بيت ..

شما: ليش ؟
ام شما: احسن لج..
شما: خلاص الي اجوفينه امايه..بخبرج بالي يصير ..

ام شما: خلاص امايه الظاهر ريلي وصل بصكر عنج..
شما: يالله مع السلامه و سلمي ع خواتي.

**
وافقت (شما) ع الخطبه..و (عمها) كان وايد مستانس..حتى(منى) مستانسه بس كانت تتمنى تنخطب شرات (شما)...

كانت بهاي الفترة تتزهب بالبيزات الي عطها لها (عمها) ..حست ان ماشي وقت ..باجي شهر وبيوصل وليد من السفر .. و هاي الفتره ما تكفي..تزهب فيهاا..

(منى) حصلت هاي الفرصه الي كانت تزهب بها (شما) انها تطلع مع ربعهاا..كانت(شما) تنصحها بس ماشي فايده..

احيانا كانت(عمتها) تطلع معها السوق..في البدايه كانت رافضه بس بعدين تقبلت ..الموضوع.

(مهره) بنت وليد كانت جريبه من شما بس الحينه قامت (شما) تجرب منها اكثر و اكثر ..و اقتنعت (مهره) بفكره ان (شما) بتصير حرمة ابوهاا..

و في يوم كانت (شما) و (منى) يالسين في الحجره..
منى: شمووووه سلفيني موبايلج ارمس فيه..
شما: ليش وينه موبايلج؟

منى: اخترب ما فيه ارسال.
شمـا : انزين عادي سولفي فيه انا ما ارمس فيه وايد.

منى: ووليد ما اترمسينه.
شمـا:لا و الله..ابيه منىما بجى شيء ع العرس..

منى: حظج بتعرسين.. و انا بتم هني مكاني.
شما: زين انا بعد بتم هني.

منى: وين بتيلسين ..بتروحين دبي معاه.
شما: انزين و نهايه الاسبوع بنسكن هني.

منى: احسدج.
شما(اتفرها بالمخده)..الله اكبــــــــر عليج.
دشت الحجره (مهره)
مهره: (اتكلم شما) عمــــــووه.

شما: هـا عموه.
مهره: ابا اروح الالعـاب.
شما: ان شا الله من عيوني بس باجر زين حبيبي

مهره: (مستانسه) انزييييييين.
طلعت (مهره) من الحجره.

منى: احسها اتعلقت فيج وايـد قدرتي ت**بينها.
شما: الحمدلله. اعرف اتعامل مع الصغاريه.

منى: امج بتي العرس.
شما: ما اعتقــــــد ريلها ما يرضى .

منى: ليش ..
شما(مضايجه) : شدراني..منى ليش ما ادورين لج وظيفه شو بعد عندج شهاده الكليه

منى: ما أباها أبا اعرس..
شما (تضحك) الله يوفقج إن شا الله..و في نفس يوم عرسي تنخطبين.

منى: آمين.

___

و في يوم العرس..(شما) اطالع عمرها في المنظره..دشت عليها (منى)
منى: يالله ..الناس يتريون.
شما: حــــــلو شكلي ..

منى: هي قمر ما شا الله عليج ولا جنج شمووه الخايسه..
شما (تضحك) عن المصاخه..منى قلبي يدق خايفه..

منى: لو مب اخوي المعرس جان سرقته منج ..يالله اطلعي الناس..

كانت(شما) اتحس بخوف بعمرها ما حسته من قبل..
نزلت قبلها..مهره..شاله باقه ورد..و نزلت شما..

بعدها..كانت اتحس ان العالم يطالعها..في البدايه ما قدرت تمشي..حست بثجل في ريولهاا..من كثر الربكه ..
بس كانت (منى) اتشجعهـا..اخير وصلت للكوشه..كانت امنزله راسها.بس شويه شويه..حست الجو عادي يوم بدت اتسلم ع الناس و يباركون لها..كانت تتمنى اتكون امها موجوده بها اللحظه ..صحيح انها باركت لها بالتلفون بس بعد ها ما يســـــد..

ما توقعت (شما) ان يكون (وليد) هو نصيبها..بعد ما رجع من السفر ..ما جافته الا البارحة..يوم الملجه..

اصلا هي كانت تجنب انه اتجوفه ..لان طبيعتها وايد تستحي..

لحظات..ودش المعرس..كانت(شما) امنزله راسهاا..وصل (وليد) الكوشه..باسها فوق راسهاا..تعلت صوت الموسيقى و قاموا الناس يرقصون..ضحكت (شما) يوم جافت عمتها ترقص..

(منى) كانت مهتمه بكشختها..تتمنى حد يجوفها و يخطبهاا..قالت شما في قلبها "حليلج منى"..و (مهره) كانت طوال الوقت واقفه حذال (ابوها) صار لها شهرين ما جافته..اتفاجات يوم (وليد) كلمها..

وليد: شموووووه تستحين..
شما منزله راسها .

وليد: قبل شهرين كنت تضحكين و تسولفين شو ياج.
شما : الحين غير..
وليد (عايبنه يجوف شما مستحيه) شو الغير ابا اعرف.

(شما) ما كانت اتفكر اترد ..بعد ما قصوا الكيك و شربوا العصير ..ساروا داخل يتصورون..

دشت عليهم (منى) ..
منى: وليد وين مفتاح سيارتك...؟؟
وليد: عندي ليش.
منى: بحط اغراض شموووو في السياره ..
شمـا: اغراض مهره بعد.

وليد(محتج) لا شو أغراض مهره ..خليها مهره عند امايه لي ما نرجع من السفر.

منى (متفاجاه) بتســـــافرون ..عيل شما ما قالت.
شما: زين ما كنت ادري..

طالعتها (منى) مب مصدقه ..
وليد: مسوي لها مفاجاه..اليوم بنبات في الفندق و باجر بنسافر ..

منى: وين...؟؟!
وليد : (يطالع شما) يوم بنرجع بنقولج مفاجاه ..

منى : عطني مفاتيح السياره زين.

**

و في الطريج للفندق ..بعد ما بارك لهم عمها و عمتهاا..
وليد:شفيها منى مضايجه..
شما: ما ادري.

وليد: و انتي شفيج..
حست انها(اول مره اتخاف اتكون مع وليد ابروحها.)

شما:-(مستحيه) ماشــــي.
وليد :-(يطالعها و يضحك) تدرين احس انج انسانه غير عن الي عاشت و اتربت معنا..

شمـا: حتى انا احس بنفس الشعور.

مسك (وليد) ايدها ..:_ و الله.تدرين عمري ما جفتج بها الجمال ..ما شا الله عليج..

نزلت (شما ) راسها مستحيه..

وليد: جنه البارحه يوم يابنج من الكليه و انتي تتحرطمين علي لاني تاخرت عليج..

وصلوا الفندق..و حط (وليد) الشنطه الي فيها ثيابهم...
شمـا: انا بدش الحمام بتغسل..

وليد:_ انزين لي ما تظهرين بيكون العشاا موجود..

دشت (شما) الحمام..عمرها ما تخيلت ان (وليد) يمكن يعاملهاا كحبيبه..حست بشعور حلو ..يوم كان (وليد) ماسك ايدهاا..

اتمنت ان ادوم حياتهم سعاده و حب ..و طبعا (مهره ) اتكون معاهم..الي بتعاملها شرات بنتهاا..عشان ما اتخيب ظن (عمها)

طلعت من الحمام..جافت العشا موجود ع الطاوله .. و (وليد) واقف يطالع برع من الدريشه..

شمـا: تعال نتعشى..
تحرك (وليد) و يلس ع الشبريه..و يلست (شما) ع الكرسي..عشان اتزهب العشا في الصحون..

كانت (شما) تتعمد ما اطالع ويه (وليد) لانها اتعرف انها ما تقدر..

هالمره طالعته وقالت
شما:_ تعـــــال مب يوعان..

وليد: (يطالع شما) شمـــــــا؟؟
شما: امـــــــر.

وليد: شي ورقه عندج ع الطاوله افتحيهـــا..
شما: من عيوني.

فتحت الورقه ..يلست اطالع الورقه..وووو بخوف اطالع (وليد) و مره اطالع الورقه..

وليد: شـو هـا.
(شما) ساكتـــــه..
وليد: جاوبينـــــي.
تحرك (وليد) من مكانه و يلس بالكرسي الي مجابل (شما).
وليد: اتوقعت انا اول انسان بيقولج جميله..طلع شي قبلي قايلنج و الله اعلم كم واحد..

دمعت عيون (شما) كيف الورقة الي كاتبنها (خالد) "فيك الجمال رهيب" وصلت هني..

(شما) مب قادره ادافع عن عمرهـا و مب قادره تفهم كيف هاي الورقه وصلت هني..

وليد: معصب) حـق شو الدمووووع الحين..و الله اتوقعتج انسانه نظيفه..يا خسارة تربيت ابوي فيج.

شمـا: و اللــــــــه..
قاطعها(وليد) شو بتحلفين جذب..انتي كيف باجر بتربين مهره..ما كنت اعرف انج جي وصخه.

شما(تصرخ و تصيح)مب انـــــــاا هاي منى.
وليد(يصرخ ع شما) منــــى اشرف منج يا ......ما في داعي اكمل انتي اتعرفين شو اقصد.

شمـا(يلست اتصيح بصوت عالي) صدقنـــــي.

وليد: شو اصدق انتي افتحي موبايلج ..جوفي كم اسم مخزنه حضرتج بعد مب سادنج واحد..و غير المسجات الي اطرشينها و تستلمينهاا.

(شما) كانت تتمنى يكون ها مجرد حلم.. و ان اول يوم بعرسها يكون غير جي ..كانت اتحاول اتقول (وليد) كل شي بس (وليد) مستحيل يصدقها..

و هي عمرها ما توقعت ان (منى) بتخونها و بتسوي فيها هالحركه..ما تخيلت (منى) لها الدرجه بتكون غيوره و حقوده لدرجه انها اتخرب عليها ليلة عرسها ..

مب بس ليله عرسها ..كل حياتها..بهاي اطريقه خسرت (وليد) و خسرت ثقته فيهاا..و الله يعينها شو ياينها باجر..

وليد: (يطالع شما باشمئزاز) بسج صياح روحي ارقدي.
شما: اباك اتصدقني.

وليد: مستحيل ..مستحيل يا شما انتي تطلعين جي ..اخر شي اتوقعه.

(شما) اتحس خلاص مب رايمه ترمس (وليد)مب راضي يصدقها..
وليد: بتسيرين ترقدين فوق الشبريه..ولا.؟؟

شما (تهمس)انت وين بترقد..؟

وليد: ما يخصـــــج فيني..روحي ارقدي هناك..

وطلع برع الحجره..و ابسرعه اتصلت(شما) بـ(منى) بس تذكرت ان (منى) موبايلها مخترب ..و كانت تستعمل موبايل(شما) بالفترة الاخيره..

اتمددت ع الفراش..وهي اتصيح..عمرها ولا خطر ع بالهاا ان بتكون جي ليله عرسها..وحيده ..اتصيح..مهمومه..وحزينه..تبا حد يواسيها..بس منو الي بيصدقها الحين..L

**

يتبع>>>

الجزء الرابع

قامت (شما) من الرقاد ع الساعه عشر .. وجافت (وليد) راقد ع الكنبه..حست بضيجه في صدرهـا..اتمنت ان كل الي صار البارحه مجرد كابوس..

حست بيوع و تعب لانها ما تعشت البارحه..
بعد ما طلعت من الحمام..يلست اطالع (وليد) وكان مغطي ويه بذراعه.. اتاملته..كانت اتقول فـ خاطرهاا

"وليد صدقني ..انا دوم كنت انصح منى انها ما اتسير بها الطريج..الي انت اتحسبه طريجي..انا كنت صادقه مع نفسي .. و كنت ابا اكون صادقه مع زوجي..عشان جي كنت دوم اضارب مع منى..""

تروعت (شما) يوم سمعت صوت(وليد) يقولهـا.
_ لي متى بتمين واقفه..ع راسي اطالعينـي.

تحركت (شما) من مكانها وفتحت الستاره اطالع الدنيا برع.

سمعت صوت باب الحمام يوم يتصكر فعرفت ان (وليد) دش الحمام..

وقفت عند التسريحه اتمشط شعرهـا ..طلع (وليد) من الحمام.. فكانت بها اللحظه (شما) اتحط بودره ع ويها عشان تمسح الحزن الي مبين ع ويهـا..

جافت (وليد) من المنظره..يفتح الكبت و يلبس ثيابه..
شما (بصوت هادي) وين بتروح.؟
غمضت عيونها يوم سمعت (وليد) يتكلم بصوت عالي.

وليد: ما يخصج فينـــي ست و ستين مره قلتلج ما يخصج فيني..

خافت (شما) اترد عليه..و ما كان عندها سلاح الا انها اتصيح..بعد ما طلع (وليد) من الحجره..كانت خايفه من القرار الي بيتخذه (وليد) صوبها..قالت بصوت عالي و هي تتنهد..
(بتحكم علي ظلم يا وليد..حسبي الله عليج يا منى.)

مرت ساعه ع طلعت (وليد) ملت (شما) من الوقفه ع الدريشه و من الافكار الي ادور و اتلف براسهـا..

يلست ع طرف الشبريه..اتفكر ادق لامها و بعدين لقوم عمها....فتحت شنطتها و طلعت موبايلهاا..

في لحظه ما كانت ادق الرقم ..انفتح باب الحجره..جافت (وليد) داش و معاه كيس توقعت (شما) يكون الفطور..

وليد : (يطالعها) اترمسيـــــن منو.
شمـا : كنت بتصل لامـــــايه.

اتجدم منها و خذ الموبايل من ايدها..
وليد (يتطنز) :_حق امج ولا حق خـالد ..ولا حمود يمكن سلوم.

نزلت (شما) راسها بالارض مضايجه من طريقه (وليد) في الكلام معها..اتفاجات يوم جافت (وليد) يفر موبايلها ع اليدار بقوه و انكسر..

وقفت شمـا : شو سويـــــــت.
وركضت صوب موبايلها لاحظت عليه اتكسر قطعه قطعه.

وليد: ما ابا اجوف عندج موبايل ..و يا ويلج ان جفتج ترمسين بالتلفون..ايدج هاي بكسرها اذا ابوي ما قدر يكسرها.

شما (تمسح دموعها) انت وايد قاسي.
وليد: (معصب)و انتي وايد قليلة ادب و مب متربيه.

كانت(شما) بترد عليه..بس خافت من النظرات الي كان يطلعها ..فسكتت.
وليد: (يامرها) اتريقي عشان بنطلع من هني.
شما (تهمس) مالي نفس.

وليد: كيفج..زهبي الشنط .

فتح (وليد) التلفزيون ..يجلب من محطه لمحطه.. و (شما) يالسه تجمع اغراضهاا ..و اغراض وليد و اتحطها في الشنطه.

لبست عبايتها و شيلتها..

**
كانت (شما) تبا تسال (وليد) وين سايرين بس خافت يصـارخ عليها...بس بعدين عرفت عن طريق كلام(وليد) بالتلفون..انهم بسيرون بيت عمها بتغدون هناك و بعدين بياخذون (مهره) معاهم..في بيتهم اليديد في دبي..

تمت(شما) ساكته طول فتره الطريج..و اتحس ان (وليد) ابد مب حاس بوجودها..

شما:_ (تترجاه) عطني فرصه أدافع عن نفسي.
وليد: شـو البارحه ما رقدتي أتفكرين بكلام اتقصين علي فيه.
شمـا: لا انت اسمعنـــــــي..و خل منى اتكون موجوده و انا ارمسك.

وليد(يطالعها محرج) مليون مره قلتلج لا ادخلين منى من بينا..و الحين طبي السالفه..لا تتحريني مقصه شرات الي عرفتيهم قبل..

نفسيه (شما) وايد تعبانه..ما اتعرف كيف بجابل عمها و حرمة عمها..بس (منى) اكيد تتوقع.الحاله الي فيها(شما)..

فكرت(شما) انها اتبين لـ (منى) انها مستانسـه..ولكأن صار شي بينها و بين (وليد)..عشان تغايضهـا..

قالت في خاطرها"يا ليتج ما سويتي فيني جي حرام عليج يا منى"

دقايق وصلوا البيت..استقبلهم (عمها) يوم جافها حضنها..كانت(شما) بتصيح بس مسكت عمرهاا..
سلمت عليها (عمتهاا) بعد ما سلمت ع (وليد)

وليد: ويـن مهراا.
ام وليد: عند منى فـ الحجره..
شما: بسير لهم.

سارت شما حجرة (منى) فتحت الباب ..جافت (منى) يالسه ع النت كالعاده..و (مهره) يالسه اتلون بدفتر التلوين..

ركضت (مهره) بحضن(شما) باستها (شما)
انتبهت (منى) لوجود (شما) وقفت اتسلم عليها.
منى(اتبوس شما) هـلا بالعروس..
شما(تبتسم) هـلا و الله..
منى: عيل وين المعرس.
وليد(واقف عن الباب) هني وراج.

ركضت(مهرا):بابـا حبيبي..
شلها(وليد) و تم يبوسها..بعدين سلم ع (منى)
اتخيلت(شما)لو كانت علاقتهابـ (وليد) زينه و حلوه كانت.بتحس براحه..

**

بعد الغداا يالسين يشربون الجاي..(مهرا) يالسه بحضن ابوهـا..و (شما) يالسه حذال (وليد) ..

حست (شما) ان (منى)اتراقب حركاتها مع (وليد) بس قدرت (شما) اتبين لها انها وايد مرتاحه مع (وليد)...و حمدت ربها ان (وليد) ما بين ولا قال لاهله شيء..

منى: عيل ما سـافرتوا.
طالعت (شما) (وليد).
وليد: طارت عنا الطياره و ماشي حجز.

ام وليد: ويـــــه خساره البيزات..الحين وين بتروحون.
وليـد: بناخذ معنا مهراا و بنسير دبي.
بو وليد: مفاتيح البيت عندك .

وليد: هي موجوده فـ السياره.
منى: (اتكلم شما) بلاه تلفونج مغلق..اتصل بج عشان ابارك لج.

شما (اطالع وليد) البطاريه امفضيه.
بو وليد: عيل رمستي امج.
شما(اجذب) هي من تلفون وليــــــد.
ام وليد: في حد ما يحــضر عرس بنته..انا لو منج ما دقيت لها تلفون.

شما: ريلها ما رضى اتي العرس.
ام وليد: اخر زمن..

وليـد: (يكلم شما) جهزتي اغراضج.؟؟
شمـا: هيه..

وليد(واقف):_عيل يالله بنروح.
منى:_تو الناس بعدني ما سولفت مع شمووووه.

ام وليد:خل مهرا معنا هالاسبوع و الاسبوع الياي خذهـا.
مهراا: بسير مع بابا..

شما: ما تبين اتيين معاي.
مهراا:(تندس ورا ابوها):: لا..بابــــا بياخذني الألعاب..

شما: بروح معاكم انزيــــــــن؟
مهراا: انزين..
ضحكوا.. بس لاحظت (شما) ع (وليد) انه طنش السالفه..وشل (مهراا) وسار صوب الباب..
بعد ما سلمواا.. ركبوا السياره..

فكرت (شما) يمكن بوجود(مهراا) معاهم بتتغير معاملة (وليد)..وقررت (شما) انها اتخف علاقتهاابـ (منى) من بعد اليوم..

و في السياره..كانت (مهرا) يالسه ورا تلعب و تغنى بصوت عالي..
شمـا: وليـد.
وليد: (من غير ما يطالعهاا) شو؟؟
شما: بمر ع امايه بسلم عليهاا..
وليد: مـــــا أقــــدر..الاسبوع الياي مري عليها..

شما: ما باركت لي بالعرس.
وليد(يتطنز) اتبين بعد حد يبارك لج..ليش بذمتج اتحسين بعمرج انج عروس..

شما(شويه بتصيح):_ لا تعامليني جـي.
وليد(منفعل) :_انتي احمدي ربج اني رمستج زين جدام اهلي .

شما: مشكور.
وليد(صرخ عليها حتى مهراا سكتت):_ لا اتحسبين انا اتريا انج تشكرين ع معاملتي لج..انتي بعدج ما جفتي شي..

حست (شما)برعشه في جسمهاا من طريقه كلام (وليد) و تهديده..

شما: لا اتكلمني بهاي الطريقه جدام بنتك.
وليد:شو تامريني انتي..؟؟

شما: (منزله راسها) لا..
مهرا:بابــــا جوف سياره كبيره..
وليد:هي بابا جفتها ..منو احلى سيارتي والسياره الكبيره..؟؟

يلست(شما) تسمع (وليد) يالس يسولف ويا بنته..اتمنت و لو يرمسها جي..بحنان .وضحك..وحب..

سندت راسها ع سيت السياره و غمضت عيونها..كانت احيانا تفتح عيونها..لصوت(مهراا) يوم تضحك بصوت عالي..او تلعب..

بعد ساعه حست (شما) بـ (وليد) يوعيهـاا...فتحت (شما) عيونها..جافت انهم وصلوا البيت...الحين بتبدأ حياتها مع (وليد) بهـا البيت...

هني عاشت طفولتها..هالبيت بيت عمها الجديم..قبل لا ينتقلون بوظبي..(وليد) استقر هني فـ دبي عشان شغله و كان يسكن بها البيت..

دشت الصاله و كانت ماسكه (مهراا) و (وليد) يدخل الشنط..

جافت البيت امرتب.. ونظيف..اتذكرت يوم قال انه ياب شركة تنظيف اتنظف البيت..

يلست(شما) ع الكنبه..اترقد(مهراا) لانها حست انها تعبانه من الخط..

بعد ما رقدت (مهراا)..شلتهاا..وخذتها الحجره الي (وليد) دخل الشنط فيهـاا.

حطت (مهرا) ع الشبريه..طلعت برع الحجره ادور (وليد)
جافته يصكر الباب..كانت (شما) واقفه عند باب الصاله..

شما: مهرا رقدت..
دش (وليد) الصاله..امطنش كلام (شما)..لحقته(شما)..
جافته يبطل الشنطه ويرتب ثيابه في الكبت..

اجدمت (شما) منه ..اتساعده..
شما: بساعدك..
بس (وليد) منعهاا..

وليد: رتبي ثيابج لا تمسكين اغراضي.
شما: ليش اتعاملني جني وحده وصخه..

وليد: لانج انتي جي و تستاهلين هال معامله..

يلست (شما) ع الشبريه ..مب قادره توقف ..كلمات(وليد) كانت مثل الخناجر في قلبهاا...و كمل وليد ترتيب ثيابه في الكبت..

شما(مضايجه): انا عشت معاك عشرين سنه و في بيت واحد..ما قد جفتك ترمسني بها الطريقه او تعاملني ..جـي.

وليد: ع بالي كنتي نظيفه ع نياتج ما اتعرفين ها السوالف..ولا اتوقعت انج اتعرفين خالد و حمود و غيرهم..

صرخت له (شما) و هاي اول مره اتسويها..
شما: قلتلك انا مـــــــالي علاقه انت ما تفهم.

سكتت يوم جافت (وليد )يطالعها بنظرات...كانها يقولها اذا ما سكتي بجتلج..

شمااا(بخوف) :_اذا سويت فيني شي بخبر عليك عمي.

اجدم منها وليـد..وصفعها ..حست (شما) ان الدنيـا ادور حوليهاا..يلست اتصيح بصوت عالي..

وصرخت يوم حست بايد (وليد) ع رقبتها من ورااا..ويررها امطلعنهاا برع الحجره..ويلسهاا ع الكنبه الي في الصاله الجريبه من التلفون...

كانت (شما) اتصيح بصوت عالي خايفه من (وليد) ..حطت ايدها ع ويهاا.يوم جافت (وليد) رافع سماعة التلفون و يصرخ لها بصوت عالي..

_هـا امسكي التلفون يالله اتصلي حق ابوي قوليه اني ضربتج ..(صرخ عليها) .امســــــكي..

(شما) اطالعه بنظرات تترجاه انه يسكت عنها..بس (وليد) كمل كلامه..

وليد: ع بالــــج بتخوفيني بابـــــويي..لو ابوي يعرف سوالفج جان ذبحج وفرج حق ريل امج..

فرها (وليد) بسماعة التلفون..وطلع برع الصاله..
اتمددت (شما) ع الكنبه..و يلست اتصيح ..

كانت دموعها دموع قهر و ظلــــم..من عيال عمها و من الزمن نفسه..
و من القدر الي وقف ضد سعادتها..و راحتها.وجلب عليهاا زوجهاا (وليد)..

**

الجزء الخامـس

بعد ما طلع(وليد) برع البيت ..وملت (شما) صيـاح..قامت تشغل نفسها..في ترتيب ثيابهـا..و كملت ترتيب ثياب (وليد)

ورتبت أغراض(مهرا) في الحجرة الجريبه من حجرتها و حجرة (وليد) ..خلتها حجره خاصه بـ (مهرا) بس رقادها بيكون معها لانه صغيره و مستحيل اتخليها ترقد بروحها..

سمعت (شما) صوت صياح..فقالت هاي اكيد (مهرا) راحت تركض حجرتها..ارتاحت(مهرا) يوم جافت (شما) فسكتت..حضنتهاا (شما)
شما: يو عانه ماما.
مهرا: هـــي.

سارت (شما) المطبخ و معاها (مهرا) يلست (مهرا) ع الكرسي و يلست تطبخ..لها عشاا خفيف.و سوت لها كوب حليب..

كانت (شما) اتحط الاكل ع الطاولة..يوم قامت (مهرا) من مكانها تركض حق ابوهاا الي كان واقف عند باب المطبخ..

حست (شما) بدقات قلبها ادق بسرعه ما عرفت خوف من (وليد) ولا الياي في المستقبل...شلهاا بحضنه و يلس يبوسهاا..

قالت (شما) بخاطرها "ليش ما تعاملني شرات مهرا..و الله اني استاهل.."

اجرب (وليد) و يلس ع الكرسي مجابل (شما) و كانت (مهرا) يالسه فوقه..

حط الاكياس الي يايبنها معاه..اتوقعت (شما) يكون عشاا.. بس ما حبت تساله ..لانه قررت انها تجنب (وليد) بعد الموقف الي صار لها قبل ساعات معاه..

شما : مهره هـا خذي الحليب.
وليد: (يفتح الاكياس):_ انا شريت عشاا.

شما: انا بعد سويت عشىى..

وليد: تعشيه ابروحج انا و مهرا بنتعشى ها العشا الي انا يايبنه.

اضايجت (شما) من حركة (وليد) بس شو الفايده ..ترا ما يهمه شي ..قالت في خاطرها

" مستحيل يكون هالانسان الي عاشت معاه و عرفته خلال ها السنين..مستحيل يكون ها وليد الي تعرفه ...""

مهرا : بـــــابــــا ..ابا حليب.
وليد : زين بابا اول كلي ها بعدي بعطيج الحليب.

قامت (شما) من مكانها و سارت تيلس بالصاله..ما تحملت تجاهل (وليد) لهاا.حست انها يالسه بعالم و (وليد) و (مهرا) بعالم ثاني..

يلست اطالع التلفزيون...شويه و طلعت (مهرا) من المطبخ وركضت صوب (شما) و يلست فوقهاا..بعدها طلع (وليد)..
وليد: ليش ما تعشيتـــــي.
شما(هي تلاعب مهرا) مالي نفس.
وليد: عيل ها الي مسوتنه..حق منو .؟؟

شما: كنت مسوتنه حق مهرا..
وليد: روحي اتعشي...وخلي معاج (مهرا) انا برقد باجر علي دوام..؟؟

شما: ليش انت ماخذ اجازه شهر.
وليد: لغيتـــــها عندج مانع.؟

شما: (تهمس) لا..

دشت (شما) المطبخ..اتفاجات يوم جافت (وليد) ماكل من الطباخ الي هي مسوتنه.. و مخلي لها اكل الي يايبنه من المطعم..

يلست تاكل.. وكانت(مهرا ) تلعب و تصارخ احيانا..
كانت (شما) اترمسهـاا..واحيانا تضحك ع كلام (مهرا) يوم ما اتتعرف تنطق الكلمه صح..

التفتوا لصوت (وليد) واقف عند باب المطبخ..
وليد: مهرا تعالي ..بابا..
اجدم و شل (مهرا) وطلع من المطبخ..

تمت (شما) اطالع الباب .."معقوله يغار لاني يالسه مع مهرا..ولا ما يباني اكون جريبه من بنته""

خلصت (شما) من تنظيف المطبخ.. وسارت حجرتها ..عشان ترقد..جافت (وليد) راقد ع الشبريه و (مهرا) معاه يلاعبهاا..

وليد: شو تبيـــــــن؟؟
شما: (منحرجه) ابا ارقد..؟

وليد:عندج حجر فاضيه روحي ارقدي هناك..و ثيابج الي رتبتيهاا في الكبت طلعيهاا و حطيها في الحجره الي بترقدين فيها..

اتفاجات (شما) من كلام (وليد..)

شما: ماشي غرف فيها شبريه الا هاي..و مهرا وين بترقد.

وليد: مهرا بترقد عندي.. و انتي دبري لج مكان..

شما: ويــــــــــن

صرخ عليها وليد: شـــــدراني البيت مليان غرف فاضيه روحي تنقي لج..

شما: (بصوت يرتجف) ماشي فراش بالغرف.
وليد: انتي ما تفهمييييين..دبري لج مكان..

طلعت (شما) من حجرتها..ويلست ع الكنبه في الصاله..و يلست اتصيح ""وين ارقدحتى لحاف ما عندي .."
اتمددت ع الكنبه ..وبعد ما اجلبت ساعات ..قدرت ترقد..

ارتجفت (شما) يوم قامت ع صوت يمشى في الصاله..
شما: (خايفه)منوووو.
حطت ايدها ع عيونها يوم اشتغل ليت الصاله..فعرفت ان ها (وليد)

وليد: تعالي ارقدي بالحجره.
شما: ما ابـــــــا..هني مرتاحه..
وليد: عيل ابرايج كملي رقادج عبالي مب مرتاحه..

شما(شويه بتصيح) :_ وليـــــد
التفت لها (وليد) و تم يطالعهاا..

شما: انا خايـــــــفه.
وليد: من شو......؟؟

نزلت (شما) عيونها بالارض ..يوم حست ان (وليد) يطالعها بنظرات ..اشفاق..
وليد: ما توقعت شعرج طويل..

طالعته (شما) مب متوقعه تعليقه..
وليد:انتي ولا مره قصيتيه.
شما: (اتحس براحه)لا عموه ما كانت ترضى..

وليد: عيل منى دوم اتقصه.
شما: هيه كانت اتخلي منى اتقصه لكن انا لا.
اتفاجات يوم لاحظت ملامح(وليد) اتغيرت.

وليد:_ شو قصدج امايه اتفرق من بينكم.
شما: (تحاول تكسب هدوء وليد) لا انا ما قلت جــي.

وليد: انتي اصلا وحده ما فيج خير..يعني انا مب مستغرب من أي كلمه تقولينها..

(شما) مستغربه ليش (وليد) رد انجلب عليهـا..
شما: (تهمس)لا تعاملني جي جدام مهرا.

وليد: و منو قالج بخلي مهرا عندج..انا مب مينون..
طالعته (شما) مستغربه..

وليد:انا بعد ما اكمل معاج كم شهر..بعرس وبخلي مهرا عند ام متربيه..تصلح اتكون امهاا مب شراتج..ينخاف منج.

اتمنت (شما) لو تبلعها الارض و لا تسمع هالكلام من (وليد)

شما: انا ما صار لي ثلاث ايام من تزوجتك و انت اتقول بتعرس علي.

وليد: و انا ما صار لي ساعتين ..ولا اكتشف ارقام شباب بموبايلج..

شما: مب انا لي ارمسهم.

وليد:لالالالالا

كانت (شما)بترد عليه ..بس (وليد) سار داخل الحجره يوم سمع صوت (مهرا) اتصيح..

لحقته..وقفت عند باب الحجره ..سمعت (وليد) يقولهاا..
_ تعالي خذي مهرا الحمام..

بعد ما طلعت من الحمام..جافت (وليد) راقد ع الشبريه ..فحطت (مهرا) حذاله..

شما: وليد برقد هني..

ما لقت جواب من (وليد) ..

شما: (بصوت تترجاه)انزين برقد ع الارض..اخاف ارقد ابروحي برع ..
يوم جافت (وليد) ساكت و مطنش..قررت تطلع برع الحجره .. ويوم وصلت عند الباب..سمعت (وليد) يقولهاا..
وليد:_ تعالي ارقدي عند مهرا..

**
فتحت (شما) عيونها وجافت (وليد) يلبس ثيابه رايح الدوام..

شما: وليد اسوي لك شي تاكله.
وليد:لا .

شما: بتطلع من البيت مب ماكل شي.

وليد: انتي شو يهمج ..هامنج شي تخافين علي مثلا..كملي رقادج ..واتحملي بمهـراا.

سكتت (شما) اطالع (وليد) اجرب منها (وليد)
وليد: خذي مفاتيح البيت و الصاله..خليهم عندج احتياط..

خذت (شما) المفاتيح..و طلع (وليد) من الحجره بعد ما باس (مهرا) ع خدهـا

توقعت (شما) حتى انها ما بتسمع كلمة مع السلامه من (وليد)..

**

قامت(شما) ع صراخ(مهرا) كانت يالسه تلعب بروحهـا ع الشبريه..

غسلتها (شما) و سوت لها ريوق..توقعت ان (وليد) بعده بالدوام

يلست تلاعب (مهرا) و بعد ما رقدتها..قامت اتسوي غداا..
سمعت صوت التلفون يرن..فسارت اتشل السماعه..

شما: الـــــووو.
وليد: انا مب قايلنج لا اتردين ع التلفون.
سكتت (شما) متفاجاه من كلام (وليد)
وليد: وينج.

شما: موجوده.
وليد: شخبار مهرا...؟
شما: توني رقدتها..و الحين يالسه اسوي غدا..

وليد: لا تسوين شي انا بييب من برع..حتى ثيابي لا اتغسلينها..اغسلي ثيابج ابروحج..

شما: ليـــــش كل هـا.

وليد (يتطنز) ما ابا اتعب حرمتيه..

شما: (تغير الموضوع) ع الساعه كم بتيي؟؟!!.
وليد: ما يخصــــــج..باي ..
وصكر التلفون..قالت (شما) بخاطرها.."انا عمري ما جفته دفش الا الحين"

دش (وليد) البيت و كانت (شما) يالسه مع (مهرا) بالحوي..تلاعبهاا..

ركضت (مهرا) لابوهاا..شلهاا(وليد) و يلس يبوسهاا..

مهرا: بابا اشتري لي لعبه اليوم.

وليد(يطالع شما) منو قالج..؟؟اشتري لج لعبه..

اتنهدت (شما) فعطت ظهرها لـ (وليد) و بنته ودشت الصاله..قالت فـ نفسها " مليت من ها الحياة و من تصرفاتك يا وليد""

بعد الغدا..(شما) اتغسل الصحون..دش (وليد) يشرب ماي..فسالته..
_ هالاسبوع بنروح بوظبي.

وليد:نهاية الاسبوع الياي..ليش؟

استغربت (شما) من رد (وليد) او مره ما يقولها "ما يخصج.."

شما: ولهت ع امايه..ابا اسلم عليها حتى تلفون ما اتصلت لها.

وليد: هي ما تسال عنج..وبعدين ياليت كل اسبوع ننزل فيه بوظبي..تيلسين عند امج..

شما(اطالعه مستغربه) ليـــــش.؟؟!!

وليد: (اجرب من مغسله الصحون) ما اباج اتكونين جريبه من منى..مهرا انا بداري عليها هني..لكن منى بعيد عني.

شما: شو قصدك؟؟

وليد: ماشي..بس افكر اخذ لج بيت ابروحج هناك في بوظبي..وبعد ما اطلقج ايلسي فيه ابروحج بعيد عن اهلي.. بتاخذين راحتج اكثر ..بدل ما اتعبين عمرج اتواعدين بالاسواق وغيره..

ما قدرت (شماا) تتحكم باعصابها..ما حست بعمرها الا معلمه ع خد (وليد) صفعه قويه..

تمت اطالع (وليد) بمشاعر مختلطه من الخوف و العصبيه..و (وليد) كان يطالعها مستغرب من ردة فعل (شما) الي ما كان يتوقعها..

حفر اصابعه ع خدها..ويلس يهزز ويهاا..
وليد:_(من بين اسنانه) ثاني مره بكسر ايدج اذا انمدت علي

(شما)ماسكه ايده اتحاول اتنزلها بس مب رايمه..ومن كثر الويع يلست اتصيح..

يوم جاف (وليد) ان (شما) اتصيح من الويع هدها و طلع من المطبخ..

بس ما كان يدري ان (شما) متالمه من كلامه اكثر من مسكت اصابعه ع خدها..
فكرت (شما) اتحط حد لكل شي ..واخر شي قررت انها
تطلع من حياة (وليــــــــد)

***
يتبع>>>>

الجزء السادس

مر تقريبا اسبوع ع الموقف الي صار بين(شما) و (وليد) ..
بعد ها الموقف..صارت (شما) تجنب (وليد) ..ما قامت اتكلمه ..ولا تهتم باكله ولا شربه مثل قبل.

حتى (وليد) ملاحظ ها الشي..بس الظاهر كان مرتاح..من موقف (شما)..

فكرت (شما) تبتعد عن (مهرا) بس قالت هي صغيره و مالها ذنب..بتتحمل (وليد) لي ما يقرر متى بيطلقها..

احيانا كانت تذكر الموقف الي سوته (منى) فيها..فكانت تضايج..

بعد ساعه وصلوا بيت عمها..وقت المغرب..(وليد) بعد ما سلم لاهله ..طلع يسهر مع ربعه..وشما تمت في حجرتها..

ما حبت اتسولف مع (عمتها) ولا حبت اجابل (منى)..و (مهرا) خذها ابوهاا بيت اهل امها..

(شما) يالسه اتجوف التلفزيون ..يوم دش عليها (عمها)

شما: حياك عمي اتفضل..

العم: ها بنتي شفيج مضايجه من شي؟
شما:لا و الله..

العم:عيل ما ييتي تيلسين معنا في الصاله.
شما: حسيت بعمري ميهوده شويه من الخط..فقلت برتاح ..
العم(واقف) قلت بطمن عليج..نترياج في الصاله.

شما: (واقفه) عمي ايلس معاي شويه..

العم:يابوج بياذن العشاا بقوم بتيدد و بسير المسيد..و ان شا الله بعد الصلاة بسولف معاج..

شما(حضنت عمها) و قالت في خاطرها"يا ليت وليد شراتك يحبني و يخاف علي"

العم: شو فيج بويه شو مضايجنج..
حبست (شما) دموعها...
شما: ماشي بس ولهت عليك..

باسها (عمها) فوق راسها..
العم: الله يهداج..اصيله شرات ابووج..الله يرحمه..

وطلع من الحجره..

دشت (شما) الصاله جافت محد فيها..فسارت حجرة (منى) دشت عليهاا ..فجافت (منى) يالسه ع النت..

شما: انتي بعدج ما ودرتي.
قامت (منى) اتسلم ع (شما)..

منى:يوم بملج بودر..اتعرفين ادمنت ع النت..
شما (تضحك) بالاول انخطبي عشان تملجين.

منى: (ترفع ايدها) ويـــــه خبرج عتيج..صار لي اسبوع مخطوبه ولبسنا الدبل.
شما(منصدمه) اتسوولفين.
منى: ليش حلال عليج و حرام علي..

شما: _ منى انخطبتي صج.
منى : و اللــــــــه.

شما: ليش محد قالي افا ..
منى: انتي في دبي وين بتيين هني ..اتصل بج تلفونج مغلق..ليش وليد ما قالج.

شما: لا ما قال.
منى: غريبه مع انه كان موجود يوم لبسنا الدبل..

شما: (تبوس منى) مبـــــرووووك حبيبتـي.
منى: الله يبارك فيج.

شما: ما قلتي منو المعرس..؟؟!!
منى: ما بتصدقين؟

شما: منوووووه..واحد من الي كنتي اترمسينهم.
منى: لا انا ما رمسته بس جافني معاج و عيبته..

شما: (مستغربه) منو؟
منى: خـــــالد.
شما : معقولــــــــه ..اكيد تعرفتي عليه.
منى: اوووووه اقولج جافني معاج..

شما: المهم مبروك ..الله يسعدكم..
فكرت (شما) هاي فرصه مناسبه اتواجه فيها (منى) ع الي سوته فـ ليلة عرسها..

شما: منى..
منى (مجابله النت) هـلا.
شما: انتي مستانسه لاني اتزوجت وليد.

منى: اكيد مب انتي اختي الي تربيت معاها لازم بفرح لج..

شما (شويه بتصيح) عيــــل ليش سويتي جي..
منى : شو سويت..

شما: ليش خزنتي ارقام ربعج ع موبايلي و تعليق خالد الي كتبه في اوراقي..

منى (طالعت شما) نعـــــــــــم.

شما: شو بتنكريـــــــن.
منى: شو قصدج ..حبيبتي اذا انتي مب مرتاحه مع وليد فهاي مب مشكلتي لا اتعقين بلاويج علي.

شما: أي بلاوي انا الي كنت اسوي بلاوي ولا انتي ..

منى: شو ع بالج انا حقوده شراتج ..الحين طلعتي علي هالرمسه لانج جفتي خالد خطبني و فضلني عليج..

شما: انا خـــــالد عمره ما كان يهمني..

اتروعت (شما) يوم سمعت صوت (وليد) عند الباب..
وليد: شمـــــاا.

(شما )حست بعمرها منهاره..ركضت تمسك ايد وليد(منى ) يوم جافت (وليد) يلست اتصيح..

شما:_ وليد اسالها منو الي كان يستعمل موبايلي ..ومنو محطي الورقه في شنطتي ..اسالها.

(وليد) ما كان يسمع..(شما) شو اتقول..لانه سحبها من ايدهاا و خذها حجرته..

فرها ع الشبريه..(شما) اتصيح.
وليد: (محرج)شو غرتي من خطوبه منى.

شما: وليد اسال منال هي اتعرف كل شي.

كانت (شما) ترمس تحاول ادافع عن نفسها..و ما كانت اتعرف شو اتقول ..حست انها يالسه اتخربط بالرمسه..بس عشان تقنع (وليد) ..

(وليد) يوم جاف (شما) كيف ترمس و طريقه كلامها جنها وحده مينونه..حاول يهديها..
يلس (وليد) حذالهاا..ومسك ايدها..

وليد: بس اسكتي اهدي..شو يااج.
شما: (تصيح) صدقني..

سكتت (شما) يوم يلس (وليد) يمسح ع راسهاا..
حست بصداع..ما تدري من كثر الصياح ولا من كثر انفعالها..

خلهاا..(وليد) راقده..وطلع من عندها..فكر يسير لـ (منى)
بس رجع عن قراره..و طلع يدور في السياره..

استغرب من ردت فعل (شما) يوم عرفت ان (منى) انخطبت..معقوله (شما) كانت تبا (خالد)..عشان جي غارت.و انهارت.

زين عيل ليش وافقت علي..يمكن ابوي اقنعها..
بس هي وايد مهتمه اني اصدقها..احتار (وليد) يسوي عمره مصدق (شما)

عشان يرتاح..بس هو عنده بنت و يخاف عليهاا..و (شما) ابد مب متاهله..انه اتربي بنته تربيه صحيحه..

الي مستغرب منه غير كل هاا..تغير معامله (شما) له بعد الطراق الي حصله منهاا..

من هاك اليوم ما كانت ترمس معاه ..و لا اتسولف..
حس (وليد) انه بدوامه..صعب يطلع منها..

كان يتمنى من (شما) تطلع غير جي..توقع حياته معها بتكون كلها حب و حياة حلوه..

بس للاسف الظروف يت عكس كل شي تمناه..
الحين هو مطمن ان (شما) ما اتسوي من وراه حركات..لان يحس انه صاك عليها من كل النواحي.

يعني مستحيل تلاقي فرصه..يمكن تغيرت بعد العرس..بس بعد ها ما يعذر الي سوته (شما) خانت ثقة عمها الي رباااها ..وعلمها كل ها السنين..

مر ع (مهرا) من بيت خالتها..و سار بيتهم..دش الصاله..جافهم متيمعين الا (شما) محد معاهم..

تمت (مهرا) مع امه..و سار غرفته..دش الحجره..و جاف (شماا) بعدها راقده..

اجرب منها..يلس يطالعها و يتامل ويهها..معقوله هالويه البريء يطلع منه كل هـا..

معقوله قلبج اسود حقود..لا و يحقد حق منو حق الانسانه الي تربت معاها و عاشت طول حياتها معها خطوه بخطوه..حتى الناس كانوا يقولون عنهن توأم..

كان بيمد ايده يلمس ويهها بس (شما) فتحت عيونها فتراجع..وسار بعيد عنها..

(وليد) محتار كيف يكلم (شما) و باي اسلوب اذا رمسته..بس اتفاجا يوم جاف (شما) امطنشته ..قامت و دشت الحمام تتغسل..

بعد ما طلعت من الحمام..
وليد: (يسالها) بعدج مصدعه..

شما : لا ..
وليد: يالله تعالي نيلس في الصاله.
شما: ما ابـــــا..ابا اسير اسلم ع امايه.

وليد: الحيـــــــن.
شما: هــــيه.
وليد: خليها باجر.
اتنهدت (شما) و يلست ع الكرسي التسريحه..
يلست اتمشط شعرها و (وليد) يطالعها..

طالعته من المنظره جافته يطالعها..ارتبكت ..لفت شعرها ابسرعه..و قامت من مكانها..

وليد: تعالي نتعشى برع.
شما(مستغربه): تباني اتعشى معاك برع.
وليد: ما تبيــــــن؟
احتارت (شما) ابشـو اترد..فسكتت..

بسير اشغل السياره البسي ..و اطلعي لي..
شما: و مهـــــــراا..

وليد: بسها اليوم هايته طول الوقت فـ بيت خالتها.

وطلع من الحجره..

**

و في المطعم
كانت(شما) هاديه..حتى (وليد) استغرب من هدوءها و انها ما قامت ترمس معاه..هو فكر اذا طلعها ع العشى بترجع اتسولف معاه ..عشان يتغلى عليهاا..بس الظاهر صار العكس..

و في السياره..
وليد: شفيج..
شما: (اطالعه)شو..

وليد: ليش ساكته ما ترمسين..؟؟

شما: مب انت الي ما تباني ارمسك و كل كلمه اقولها لك قلتلي (مايخصج)..

وليد: يعني وحده بوحده..

سكتت (شما) شويه ..
شما (همست) وليد..

وليد (طالعها) نعم..؟
شما: (دموع تجمع بعيونها):طلقنـــــي.
انصدم (وليد) من الكلمه الي قالتها (شما) اتوقع (شما) اخر شي اتفكر فيه الطلاق..بس هو الحين اتاكد من شكوكه و عرف ليش هي طلبت الطلاق.

وليد: ان شا الله بس مب الحين..اتريي شويه.
شما: متـى

وليد: بعد ما خالد ومنى يعرسون..
شما: و انا شو يخصني بزواجهم.

وليد: انتي ع بالج لو طلقتج الحينه..بترومين اترجعين خالد لج..بعد زواج منى بسوي كل الي تبينه..

شما: (كاتمه غيضها) انت طول عمرك بتم جي شاك فيني..يا ابن الحلال خالد ما يهمني بشي.

وليد: معلوم ما يهمج و الدليل الانفعال الي صار لج يوم عرفتي ان منى انخطبت حق خالد.

شما:(تبلع ريجها بصعوبه) انا اكـــــرهك..

وليد: ما عليه اتحمليني..حتى انا مب طايقنج.

**

الجزء السابع

في اليوم الثاني..طلعت (شما) من حجرتها و سارت الصاله..جافت عمتها ..يالسه..باستها فوق راسها و يلست..

لاحظت (شما) ان عمتها زعلانه منها..يمكن عرفت بالموقف الي صار البارحه مع (منى)..
شما: عموه وين منى.و مهراا

عمتها: منى فـ حجرتها..ومهرا طلعت مع ابوهـا
شما: شو مسوين غداا.

عمتها: مجبوس دياي..ترا الشغاله وديتها بيت اختي..تساعدهم في شغل البيت..

فهمت (شما) شو تقصد عمتها..تباها اتنظف لها البيت..بس (شما) طنشت..وراحت حجرة (منى)
جافت (منى) راقده..

يرت اللحاف من فوق (منى) ..
شما: قومي بسج رقـــــاد اكيد سهرانه ع النت..لي الفير.

منى: (تجلب ع لافراش) خليني ارقد.

شما: (تتحرش بمنى) ياللــــــــه قومي يلسي معاي.
يلست (منى) ع الشبريه..
منى: هـا شو عندج بعد بضاربين.

شما: اسفه ع الموقف الي صار البارحه..بس انا و انتي تعودنا نضارب و نتصالح.شرات الاخوان...صح.

منى: الحمـــــدلله يعني انتي شمووه الي اعرفهاا..
شما (تضحك) ليش البارحه شو كنت..؟؟

منى: يمكن متلبسه.
شما:-(تضرب منى ع ركبتها) بسم الله علي.

شما(واقفه) :- قومي يالله انحطي غدا ترا ماشي شغاله في البيت..

منى: _وينها سافرت
شما:- هي عموه طيرتها بيت خالتج ..يلا قومي..

طلعت (شما) من حجرة (منى) فجافت عمها و وليد يالسين في الصاله ..ومهرا يالسه فوق ابوها..

شما: مهرا عنوني وينج من زمان ما جفتج.
مهرا(تراوي لعبتها لشما) شوفي بابا اشترى لي لعبه.

شما (تضحك) الله لعبتج حلوه ..وين لعبتي..

اتفاجات (مهرا) من سؤال (شما) يلست اطالع (وليد)
مهرا: بابا ما اشترا لج.

شما: مايستحي صح..
مهرا: هيه..بابا ما تستحي ليش ما تشتري لعبه حق ماما.

طالعت (شما) ..(وليد) جافته يطالعها بنظرات بس ما فهمت نظرتن عتب ولا لوم ولا شو..

العم (يضحك) شمووه بعدها ياهل تبا العاب.
شما : (تضحك) هي بتم بنظرك ياهل ..

و اجدمت اتبوس راس (عمها) ..جافت (وليد) مضايج من حركات (شما) ..فحبت (شما) اتغايضه اكثر..

شما: (بدلع)عمي بطلب منك طلب قول تم؟؟
العم: و انا اروم ارد لج طلب.

شما: تعال معنا دبي باجر..
العم: تدرين عندي اشغال هني.

يلست (شما) تتمايل شرات اليهال ..
شما: ما يخصني انت عودتني ما اترد لي طلب ما يخصني ترا بزعل.

طالعت (وليد) حست انه شويه و بيقوم يصفعها..

العم (يضحك) اوعدج بيي بس خلينا اخلص اشغالي.
شما (تبوس خد عمها) :_ربي ما يحرمني منك يا اغلى عم...اممم بسير المطبخ اساعد عموه.

بعد الغـدا..سارت شما حجرتها اتنظف الحجره ..دش عليها (وليد) يوم جافها ..يلس يقلد صوت شما.

وليد:- ربي ما يحرمني منك يا اغلى عم..
.
ابتسمت (شما) كانت بتضحك بصوت عالي لانها اتاكدت ان (وليد) كان منقهر منها..بس طنشت..

حاول (وليد) يستفزها..
وليد: لازم بتدعين له ها الدعاوي..مخلنج ع راحتج لي ما ضعتي.
نافخت (شما) وقامت تبا تطلع من الحجره..بس (وليد) يرها من ذراعهاا..و يلسها ع الشبريه.

وليد: يوم انا برمسج توقفين تسمعين الرمسه..

شما: يوم بتعرف ترمس شرات الاوادم برد عليك.
وليد: اتبيني ارويج كيف ارمس شرات الاوادم.

شما:انت شـــــو تبا فيني ..

وليد: اتصدقين ..ما عندي سالفه ابرايج خذي راحتج انا بطلع..

كانت (شما) بتقوله لا تطلع تم سولف معاي انا ما صدقت ..فجيت عني شويه..بس ما قدرت تتكلم..

(وليد) هو طالع من الحجره..يالس يقول في خاطره انزين ازقريني قولي تم حبيبي فقدتج بس اتعرفين ترمسين ويا غيري..

**

(شما) في المطبخ تغسل مواعين الغـدا ..جافت عمتها ما ترمسها زين فقالت بغسل المواعين يمكن ..ترضى عنها..
دشت عليها (منى)

منى: شموووووه.
شما: هـــا

منى: تعالي معاي السوق ..من زمان ما طلعت معاج ..أيــــــاام.

شما (تضحك) بس في السياره تطلعين معاي بعدين تودريني ..و تروحين ويا فلان و علان.

منى (تضحك) مال اول انتي ..بطلع ابا اتزهب يالله تعالي معاي..

شما: (تتغلا) ما بسير ليش ما قلتي عن خطوبتج.

منى (تترجاها) و الله بغيت اقولج بس تلفونج مغلق ..و يوم عرفت ان (وليد) بيي حسبت انه خبرج و بتيين معاه..

شما:انزين وليد محد ما اروم اطلع و بعدين منو بيتم مع مهرووو..

منى: ما بقول شي لانج طالعه معاي و مهرا عند امايه اووف ذليتنا بتين ولا لاء.

شما: زين بعده ما اذن العصر.هي قبلها بمر اسلم ع امايه..

منى: اوكى ..بس انتي خلصي الي بايدج و بعدين بتصل بالدريول..
شما: زين تعالي ساعديني.

منى: اوووووه يوم بتخلصين قولي.

وطلعت برع المطبخ..
*
وقت العشاا دشت (شما) و (منى) البيت راجعين من السوق و كل وحده شاله لها اكيــــاس

ام وليد: و ابويه شي اغراض تمت بالسوق بعد..

شما (تضحك) هلكتني بنتج..تعالي مهرا حبيبي جوفي شو يبت لج..

استانست (مهرا) باللعبه الي يابتها (شما)

منى: تعالي حطي الاغراض في حجرتي.. شمووه.

شما: يالا ولخلي عموه اتجوفهاا..

كانت (شما) اطلع اغراض (منى) اترويها حق عمتها و عمتها مستانسه ..

مهرا: بابا جوف ماما شو يابت لي.

حست (شما) بقلبها بيطلع من مكانه يوم جافت (وليد) واقف عند بابا الصاله يطالعهاا..شل (وليد) ..(مهرا)
وليد(محرج) وين كنتي؟؟

شما (مرتبكه اطالع منى) في السوق مع منى.

وليد:منو امرج اتروحين السوق؟؟!؟..

حست (شما) بالاحراج يوم جافت (وليد) جي يرمسها حذال (منى) و (عمتها)..

شما: عموه اتعرف اني بظهر.
وليد(يصرخ ع شما): المهـــــــم انا ..انا ريلج مب عموتج.

كانت (شما) شويه و بتصيح لانها حست ان (وليد) يتعمد يحرجها جدام اهله..فكرت اتقوم تطلع من الصاله و اتروح حجرتها..

بس (وليد) واقف عند الباب ..فتراجعت..

عمتها: انــــزين الله يهداك يمه ما طلعت مع حد غريب مع اختك ساروا يشرون ..

وليد: لو سمحتي امايه يوم برمس مع زوجتي محد يدخل.

اتمنت (شما) بها اللحظه اتكون شرات(مهرا) ياهل ما اتعرف شي في سوالف الدنياا..همها بس تلاقي العاب

بمجرد ما (وليد) قال هالكلمتين..سكتت عمتها و ما عرفت شو اترد..طبعا (منى) مستحيل ترمس لانها خوافه..

(شما) اطالع وليد بنظرات تباه يسكت..بس (وليد) طنش..
وليد:- ثاني مره اذا طلعتي من غير ما اتقولين يا ويلج ..تسمعين..

طالعته (شما) من غير ما اترد..

وليد: تسمعيــــــن.

شما(شويه و تصيح): ان شا الله.

طلعت (شما) بعد ما (وليد) يلس ..وسارت حجرتها..
يلست ع الشبريه اتصيح..لو كان عمها موجود ما كان اتجرأ و رمسها بهاي الطريقه جدام اهله..

كانت تتمنى اتكون قويه اترد عليه ..تجرحه في الكلام اتهينه ..بس هي طبعها تستحي ..خجوله ..ما تقدر اتخاف من داخلهااا

سارت الحمام اتغسل ويهااا..يوم طلعت جافت وليد في الحجره..

طنشته..بس مسكها ولف ذراعها..
وليد(يسالها) وين سرتي..؟؟

شما: (خايفه من نظرات وليد) قلتلك السوق.

وليد: جـــــذابه اكيد كنتي مواعده قولي ..الصج.

شما(صاحت) قلتلك ما اعرف حد عشان اواعده ..
وليد: احلفي.؟؟
شما: و اللــــــه ..ما فارجت منى طوال الوقت و قبلها مريت حق امايه اسلم عليهاا..

وليد: قسم بالله لو طلعتي مره ثانيه من غير ما ادري ما بيصير لج خير.

بعد ما فلت (وليد) ذراعهاا و حست انه صار بعيد عنها..و انها بامان ..قالت بنبره ضعيفه..
شما:- بخبر عليك عمي..

في ها اللحظه (وليد) امبطل الباب عشان يطلع ..بس يوم سمع جملة (شما)

صكر الباب بقوه ..وسار صوبهاا..ركضت (شما) الحمام..و كانت بتقفل الباب ع روحها بس ما لحقت..فتح (وليد) الباب

فردت (شما) ورا ..و كانت امبطله عيونها من كثر ما هي خايفه من (وليد)

وليد: شو قلتي.

شما: (تهمس) ماشي..
وليد: اقولج شو قلتي..سمعيني مره ثانيه..

تمت (شما) ساكته..خايفه ..تبا حد يساعدها بس حست انها و وليد بكون..و العالم كلهم بكون ثاني..

رجعت وراا .. (وليد) يجدم منهاا..
وليد: قولـــــي.
شما: (تهمس) انا اسفه ما بكرر الي قلته.

وليد: هـــي جي اتادبي و ثمني كلامج..ترا لا عمج ولا حد في الدنيا يقدر يمنعني من الي اسويه بحرمتي..صح..

(شما) من الخوف يلست اتهز راسهاا موافقه ع كلام (وليد)

وليد: (يبتسم) اول مره اجوفج جي خوافه..
اتفاجات (شما) من تغييييير المفاجا الي صار بـ (وليد)

وليد: لها الدرجه تخافين مني..

شما: (بصوت خفيف) انت مينون.
وليد: انتي خبلتي فيني ..

كانت (شما) بترد عليه ..بس التفتوا لصوت الي كان عند الباب..

مهرا: شو تسون داخل الحمام.

وليد (يطالع شما) ماشي بابا يالسين نلعب.
مهرا: شو تلعبون.

(وليد) يمسك ايد(شما) و يطلع من الحمام..

وليد: خلاص بابا خلصنا لعب..
(يرمس شما) عشيها و خليها ترقد ..ما فيني تسهرني فليل باجر ورانا خط.

شما: انزين..

وليد: اخيرا رمستــــي..يا الخوافه.
شما: مب خايفه.

وليد: عيل شو..؟؟
شما(تصد الصوب الثاني) ولا شي..

شهقت يوم وليد قرصها من خدودها..ضحك وطلع برع الحجره.
استانست(شما) من الحركه الي سواها (وليد) شلت (مهرا) و يلست ادور فيها..و يضحكون.

شما: بابا مينون..صح
مهرا (تصرخ) لا

شما: (تضحك) امبلى مينون
مهرا(تصرخ) لا

وتصيح و (شما) تضحك عليهاا..

الجزء الثامن

خمنت (شما) انها بعد ما قامت اتعامل (وليد) شرات ما يعاملها.. و اطنشه..جافت هو الي قام يرمس معها..
حست (شما) بتغير معاملة (وليد) لهاا .

و ظنت الموقف الي صار حذال (منى ) و عمتها..يمكن ها واحد من الاسباب..

(شما)تبا تحافظ ع هاي المعامله..فكانت تسمع كلام (وليد) في كل شي..

كانت تجنب ترمس بالتلفون شرات ما يبا.. و ما ترمس معاه الا اذا رمسها.. حتى الطلعه من البيت ما كانت تطلع..الا اذا هو بغاا..

صحيح هي كانت تسمع مرات نغزات في كلامه..بس كانت تجنب انها اترد عليه..

مر شهرين ..و حياة (شما) مع (وليد) بهاي الصوره..كانت(شما) اتجوف مب هاي الحياة الي يعيشها كل الازواج..و كل الناس.. بس بالنسبه لبدايه حياتها مع (وليد) تحس براحه نفسيه..مب مثل قبل..

حتى (مهرا) كانت تلعب دور كبير في حياتهاا..حست هي الي اجرب (وليد) من (شما) بس من غير قصد..

فمثلا في مره كانت (شما) اتغسل الحوي في بيتهم الي في دبي..و كانت (مهرا) معها ..كانوا يلعبون بالصابون..
و يضحكون بصوت عالي..

وليد يالس عند بابا الصاله يقرا جريده..(شما) تدري انه احيانا كان يطالعها و يطالع بنته..

مهرا: بابا تعال العب معنا..
وليد(بعده يقرا الجريده) انزين بابا انزين..

(مهرا) كانت تلعب شويه و تزقر ابوها شويه..بس (وليد) كان امطنشهـا..

وليد: (يكلم شما) بسكم لعـب خلصتوا الماي.
شما :( اترمس مهرا) اتبين بابا يلعب معنا.

مهرا: بابا ما يطيع.
شما: الحين بطيع....

اجدمت شما منه و رشت الجريده بالماي..
اتروع (وليد) :يا الهبــــــله..

(شما) و (مهرا) يلسوا يضحكون ع ردة فعل (وليد)..
وليد: شو سويتي خرستي الجريده ماي ..
شما: عشان مره ثانيه ما اطنش بنتك..

وليد: انا مب فايج لج ولا لها ويا ها اللعب الي يلسين تلعبونه.

مهرا: (اتصرخ لشما) رشيه ماي ..ماما.

وليد: (يصرخ ع مهرا) مهـــــــراا..

شما (مستانسه) من عيونـي كم مهرا عندي..؟؟

اجدمت (شما) منه مره ثانيه ورشته بالماي.. (مهرا) و (شما) يضحكون ابصوت..عالي..يوم يجوفون (وليد) يتروع من الماي..

قام (وليد) من مكانه ..شلت (شما) ..(مهرا) و يلست تركض بها في الحوي ..و (وليد) يرشهم بالماي..

كانوا يصارخون..مستانسين من الماي الي ينزل لهم..
جنه مطر ينزل لهم..

(وليد) اجرب من (شما) و يلس يساسرها.
وليد: يا ليييتج كنتي غير جي..كانت حياتنا بتكون احلى .

شما: (تهمس) شو تقصد؟؟

طنشها (وليد) وسار داخل..
تمت (شما) واقفه اتفكر في كلام (وليد) الحين عرفت ان (وليد) بعده ماخذ عنها فكره سيئه..اتنهدت مب عارفه كيف تقنع هالانسان....

قامت اتبند الماي و (مهرا) اتصيح بعدها تبا تلعب...

**

توقعت (شما) بعد الكلام الي قاله (وليد) انه بيرجع شرات قبل ما يرمسها..بس بالعكس ..كان يرمسها و يضحك معاها احياناا..

بس كانت اتحس تصرفاته و معاملته لها كانت بحدود..

.. و في بيت عمها الكل كان يتزهب لعرس (منى) بعد يومين...

دشت (شما) لـ (منى) في الحجره..كانت (منى) اترتب ثيابهاا..في شنط.

شما: مستانسه منى.

منى: وايد شمووووووه..اخيرا بعرس..اوف ما بغيت..

شما: ليش ما اتسوين حفله ملجه ..و بعد كم شهر العرس..

منى: لا لا لا انا ما صدقت اني بملج و في نفس اليوم بعـرس ما اصبر ..ابا احس اني عروس..

شما: تضحك عنبوه اشفيج طايره..

منى: بذمتج شمووه مب حلو يوم اتعرسين.

شمافي خاطرها" انتي خليتي شي حلو في حياتي .."
شما: عـادي.

فتحت (شما) الكمبيوتر ..و يلست تفتح مواقع اغاني..

منى: شموو امسكي موبايلي..بسير اسبح..اذا اتصل خالد خبريه اني اسبح و بسوي له عقب..

شما: (متردده) لا لا ما يخصنــــي استحي.
منى: شو تستحين ها الحين نسيبج يودي لااه.

حطت الموبايل جريب من الكمبيوتر .. و سارت الحمام..

يلست (شما) تسمع اغاني..رن موبايل (منى)
استغربت (شما) من الرقم..
شما: هالرقم ما اعرفــــــه ..ما برد.
بس تم الموبايل يرن..

شما: الـــــوو
المتصل: مرحبا.

شما: اهلا..منو؟
المتصل: منى.

شما: لا منى مشغوله من انت؟؟
المتصل: اوكى قولي لها ادق لي..السموحه ..

طالعت (شما) الموبايل.."معقوله ها خالد..الظاهر منى ما اتيوز ع سوالفهاا"

و قبل ما اتحط الموبايل ع الطاوله..دش (وليد) حجرة منى..

وليد: اترمسين منوو؟
شما: (وقفت )محـد ها موبايل منى

وليد(محرج) ادري موبايل منى ليش ترمسين فيه.

شما(ادافع عن عمرها) انا ما رمست..

قاطعها وليد :- وين منى.

شما: تسبح في الحمام.
وليد :- يعني داخل..
سكتت (شما) يوم جافت (وليد) يجرب منها..مسك ايدها و طلعها برع الحجره..و ساروا حجرتهم..

وليد: ما شا الله يالسه ع النت و ماسكه الموبايل..شو اشتقتي لايام زمان..

شما: وليد انت ليش دوم افكارك جي عني.

وليد: ليش شو تتوقعين ..اذا ع بالج ضحكت معاج شويه و سولفت شويه ع بالج خلاص طاح الحطب.

شما (اترد عليه) انت ليش امكبر السالفه.

غمضت عيونها..يوم سمعت صوت (وليد) عالي.
وليد: كنتي اترمسين منووووو ع الموبايل قلتلج.

شما( تصيح) :-منى قالت لي ارد ع خالد اذا دق هي بتسبح.

وليد: لا و الله..
شما: اسال منى..اذا مب مصدقني.

وليد: وشو كنتي اتسوين ع النت..؟
شما: اسمع اغاني ما فتحت مواقع ثانيه..و الله

وليد: ما عليه شمووه انا براويج..
وطلع برع الحجره..
(شما) تضايجت ..ما تقدر اتسوي شي الا و انجلب عليها (وليد)
قالت في خاطرها"متى برتاح من ها العذاب..انا لازم اخلي منى اترمس وليد..غير جي ما بتغير شي"

**

الباقي يعدين تعبت!!

اذا انتهيتوا من هذي الاجزاء خبروني عشان اكمل :)

بليييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييزكملي والله تحمست

» براءة طفل حين قال: أبي ليتك إنت الميت ؟